الشروط والخصوصية

آخر تحديث: 9 نوفمبر 2026

سادة بيعمل إيه

سادة برنامج كاشير وحسابات للكافيهات والمطاعم، بيشتغل على الكمبيوتر والتابلت والموبايل. مفيش عقد بينك وبين سادة: الصفحة دي هي الاتفاق، واستخدامك للبرنامج معناه إنك موافق عليها.

الاشتراك والدفع

الاشتراك شهري أو سنوي، من غير عقد. الدفع بيتم بإيدك، ومفيش خصم تلقائي من أي حساب.
لو مجددتش، الاشتراك بينتهي لوحده في آخر المدة اللي دفعتها، ومفيش عليك أي التزام.
التجربة المجانية بتنتهي في آخر يوم ليها، والكاشير بيقف اليوم اللي بعده لحد ما تشترك.
بعد انتهاء الاشتراك المدفوع ليك 7 أيام سماح، وبعدها الكاشير بيقف لحد التجديد. بياناتك بتفضل محفوظة.
السعر ثابت طول المدة اللي دفعتها. الأسعار بتزيد مرة واحدة بس في السنة، في يناير، وبنبلّغك قبلها بـ 30 يوم. وسعر المؤسسين ثابت سنة من يوم اشتراكك.

الإلغاء واسترجاع الفلوس

تقدر تلغي في أي وقت برسالة واتساب، والبرنامج بيفضل شغال لآخر المدة اللي دفعتها.
الاشتراك الشهري: التجربة المجانية هي فرصتك تتأكد إن البرنامج مناسب ليك، فالشهر اللي اتدفع مبيترجعش، ومفيش استرجاع لجزء من شهر.
الاشتراك السنوي: لو طلبت الإلغاء في أول 14 يوم بترجعلك فلوسك كلها. بعدها بيرجعلك اللي دفعته ناقص الشهور اللي بدأت، محسوبة بالسعر الشهري لباقتك، لو فضل حاجة.
لو دفعت مرتين أو دفعت زيادة بالغلط، الزيادة بترجعلك كلها.
لو الكاشير وقف أكتر من 24 ساعة متواصلة بسبب عطل عندنا، بنعوّضك بأيام اشتراك زيادة قد مدة العطل.
لو إحنا قررنا نوقف الخدمة نهائياً، بنبلّغك قبلها بـ 30 يوم وبيرجعلك تمن المدة اللي متاستخدمتش.
اطلب الاسترجاع على الواتساب، والفلوس بترجع بنفس طريقة الدفع خلال 7 أيام عمل.
بعد الإلغاء بياناتك بتفضل محفوظة ولو رجعت هتلاقيها. تقدر تنزّلها أو تطلب مسحها في أي وقت.

بياناتك

بيانات مكانك ملكك: المنيو والفواتير والمخزون والحسابات وبيانات عملائك.
بنخزن اللي البرنامج محتاجه عشان يشتغل: إيميل صاحب المكان، وبيانات المكان، وأسماء الموظفين، والفواتير، واسم عميلك ورقمه لو سجلتهم.
الرقم السري للموظف مش بيتخزن زي ما هو، وكل مكان بيشوف بياناته بس.
لو البرنامج حصل فيه خطأ، بيتبعتلنا نص الخطأ ومكانه عشان نصلحه، من غير بيانات طلبات أو عملاء.
قياس عدد الزيارات: الصفحة التعريفية وصفحة الشروط بس فيهم Google Analytics، عشان نعرف عدد الزيارات والزراير اللي بتتداس، من غير إعلانات ولا ربط بحسابات جوجل. البرنامج نفسه (الكاشير وصفحات المالك) مفيهوش قياس خالص.
مش بنبيع بياناتك لحد. البيانات متخزنة عند الشركات اللي بتشغّل البرنامج (Supabase وCloudflare).
تقدر تنزّل بياناتك في أي وقت، ولو عايز نمسحها كلّمنا على الواتساب.
أنت مسؤول عن إنك تعرّف عملاءك إنك بتسجل بياناتهم، وعن الحفاظ على كلمة السر والأرقام السرية.

بيانات عملاء المكان

سادة بيحفظ لعملاء المكان: الاسم، والتليفون لو اتكتب (اختياري)، وملاحظة، وزياراتهم وفواتيرهم. صاحب المكان هو المسؤول عن البيانات دي، وسادة بيشيلها له.
رسايل العروض بتتبعت من واتساب صاحب المكان نفسه، للعميل اللي وافق بس. الموافقة بتتسجل بوقتها ومنين والجملة اللي اتقالت له، والكاشير بيسأل العميل الأول.
البرنامج مبيطلعش لينك رسالة لعميل موافقش أو ألغى، وبحد 20 رسالة في اليوم لكل مكان، وكل رسالة آخرها طريقة الإلغاء.
العميل يقدر يوقف الرسايل في أي وقت: يبعت «إلغاء» على واتساب، أو يقول للكاشير، وصاحب المكان يعلّمه «ألغى الاشتراك». كارت الولاء والأختام بيفضلوا شغالين عادي.
صاحب المكان يقدر ينزّل بيانات عملائه في أي وقت.
لو عميل طلب مسح بياناته، صاحب المكان يبعتلنا الطلب على الواتساب، وبيتنفذ خلال 30 يوم: الاسم والتليفون والملاحظة بيتشالوا، والفواتير بتفضل بمبالغها من غير اسم عشان حسابات المكان. النسخ الاحتياطية اليومية بتتمسح لوحدها بعد 30 يوم، فبيانات العميل بتختفي منها هي كمان خلال 30 يوم من المسح.

الشغل من غير نت

الكاشير بيكمل بيع ودفع وطباعة والنت فاصل، والعمليات بتتحفظ على الجهاز وتتبعت لوحدها لما النت يرجع. لازم يكون الجهاز فتح الكاشير والنت شغال مرة قبل كده.

فتح وردية من غير نت متاح للموظف اللي دخل قبل كده على نفس الجهاز.
محتاجين نت: قفل الوردية، والخصومات، وحركة الدرج، واختيار عميل، وشاشة المطبخ، والتقارير.
متمسحش بيانات المتصفح ومتغيّرش الجهاز قبل ما كل العمليات تتبعت، لأن اللي لسه متبعتش موجود على الجهاز ده بس.

الضرائب والإيصال الإلكتروني

سادة لسه مش مربوط بمنظومة الإيصال الإلكتروني. أنت مسؤول عن التزاماتك الضريبية، واسأل محاسبك لو مكانك ملزم بيها. تقارير البرنامج بتساعدك في حساباتك ومش بديل عن المحاسب.

الاستخدام المقبول

الاشتراك لمكان واحد. ممنوع استخدام البرنامج في حاجة مخالفة للقانون، أو محاولة اختراقه أو الوصول لبيانات مكان تاني. لو ده حصل بننبهك، ونقدر نوقف الحساب لو استمر.

حدود مسؤوليتنا

بنعمل كل اللي نقدر عليه عشان البرنامج يفضل شغال وبياناتك متأمنة بنسخ احتياطية، لكن ممكن يحصل عطل برة إيدينا، زي عطل عند الشركات اللي بنعتمد عليها. راجع تقفيلاتك أول بأول، ونزّل نسخة من بياناتك كل فترة. في حدود ما يسمح به القانون، أقصى مسؤولية علينا هي اللي دفعته في آخر 12 شهر.

التعديلات والقانون والتواصل

لو غيرنا الشروط دي بنعدّل التاريخ اللي فوق، ولو التغيير كبير بنبلّغك. الشروط دي خاضعة للقانون المصري، وأي خلاف بنحاول نحله ودّياً الأول. لأي سؤال كلّمنا على الواتساب: 0109 291 0062.